Müqəddəs Kitab
Yeşaya - Fəsil 3
Fəsillər: Giriş 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66
Yerusəlimdə qarmaqarışıqlıq
1) Budur, Sahibimiz, Ordular Rəbbi Yerusəlimdən və Yəhudadan hər bir yardımı, köməyi kəsəcək, Orada çörək, su tədarükü qalmayacaq.
2) İgidlərlə cəngavərləri, Hakimlərlə peyğəmbərləri, Falçılarla ağsaqqalları,
3) Əllibaşılarla adlı-sanlı adamları, məsləhətçiləri, Mahir sehrbazlarla cadugərləri aradan götürəcək.
4) Uşaqları onların üzərinə başçı qoyacağam, Qoy körpələr onlara hökm etsin.
5) İnsan insana, qonşu qonşusuna, Cavan yaşlı ilə, adi adam nüfuzlu insanla Həyasızcasına rəftar edəcək.
6) Ailədə qardaş qardaşa Sarılıb deyəcək: “Sənin heç olmasa Əyninə geyməyə paltarın var. Başçımız ol, Qoy bu xarabalıqlar sənin əlinin altında olsun!”
7) O vaxt bu adam uca səslə söyləyəcək: “Mən yaralarınızı sarımağı bacarmaram, Çünki evimdə nə yemək, nə də paltar var, Məni xalqın başçısı qoymayın”.
8) Yerusəlim sarsıldı, Yəhuda dağıldı, Çünki sözləri və əməlləri Rəbbə qarşı oldu, Onun əzəmətli hüzuru kimsə tərəfindən sayılmadı.
9) Sifətlərinin ifadəsi onlara qarşı şəhadət edir, Günahları haqda Sodomdakı kimi açıq danışırlar, Bunu gizlətmirlər. Vay onların halına! Axı bu bəlanı özləri gətirdi başlarına.
10) Saleh adamlara söyləyin ki, Onlara yaxşılıq ediləcək, Çünki onlar xeyirxahlıqlarının bəhrəsini yeyəcək.
11) Pis adamların vay halına! Çünki onlara pislik olunacaq, Elədikləri əməlləri qarşılarına çıxacaq.
12) Uşaqlar xalqıma zülm edir, Qadınlar üzərimizdə hökm sürür! Ey xalqım, sənə yol göstərənlər Səni azdırır, yolunu dolaşdırırlar!
13) Rəbb məhkəməsini qurmaq üçün qalxır, Xalqları mühakimə etmək üçün durur.
14) Rəbb xalqının rəhbərlərini, Başçılarını məhkəməyə gətirir: “Sizsiniz üzüm bağını yeyib-dağıdan, Kasıbların malı ilə evlərinizi dolduran.
15) Nə haqla xalqıma zülm edib Yoxsullara əzab verirsiniz?” Bunu Xudavənd, Ordular Rəbbi bəyan edir.
Yerusəlim qadınlarına xəbərdarlıq
16) Rəbb deyir: Sion qızları çox təkəbbürlüdür, Boylana-boylana gəzir, göz-qaş oynadır, Addımlarını asta-asta atırlar, Ayaqlarındakı xalxalları cingildədib yeriyirlər.
17) Buna görə də Xudavənd Sion qızlarının başlarına qotur salacaq. Ayıb yerlərini açıb göstərəcək.
18) O gün Xudavənd bəzəklərini – Topuqlara taxılan bilərziklərini, Araqçınlarını, aypara şəkilli boyunbağılarını,
19) Sırğalarını, qolbaqlarını, örpəklərini,
20) Tac şəkilli başlıqlarını, Bazubəndlərini, qurşaqlarını, Ətirlə dolu mücrülərini, Tilsimlənmiş bəzək əşyalarını,
21) Üzüklərini, burun halqalarını,
22) Bayram libaslarını, paltarlarını, Örtüklərini, əl çantalarını,
23) Güzgülərini, nəfis toxunmuş kətan libaslarını, Çalmalarını, duvaqlarını əllərindən alacaq.
24) O vaxt gözəl ətir qoxusu yerinə üfunət iyi, Qurşaq əvəzinə ip, Gözəl daranmış saç əvəzinə keçəl baş, Bayram libası əvəzinə çul geyiniləcək, Gözəllik əvəzinə damğa vurulacaq.
25) Kişiləriniz qılıncdan tələf olacaq, İgidləriniz döyüşdə yox olacaq.
26) Yerusəlimin darvazaları Nalə çəkib yas tutacaq, Bu şəhər isə kimsəsiz qadın tək, Quru yerdə oturacaq.
