Müqəddəs Kitab

Yeşaya - Fəsil 17

Fəsillər: Giriş 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66

Aram və İsrail haqqında peyğəmbərlik

1) Dəməşq barədə xəbərdarlıq: Budur, Dəməşq daha şəhər olmayacaq, Bir yığın xarabalığa dönəcək.

2) Aroer şəhərləri tərk olunacaq. Oralar sürülərin otladığı yer olacaq, Onları qorxudan olmayacaq.

3) Efrayimdə qalalı şəhər qalmayacaq, Dəməşqin hakimiyyəti yox olacaq, Sağ qalan Aramlıların qüvvəti İsrail övladlarının qüvvəti tək olacaq. Bunu Ordular Rəbbi bəyan edir.

4) O gün Yaqub nəslinin əzəməti sönəcək, Hamısı bir dəri, bir sümük qalacaq.

5) Biçinçi bitən taxılı biçdiyi kimi, Başaqları əli ilə yığdığı kimi olacaq, Refaim vadisində başaqları topladığı kimi olacaq.

6) Zeytun ağacı silkələnəndən sonra Təpəsində iki-üç zeytun qaldığı kimi, Bəhərli budaqlarında dörd-beş zeytun qaldığı kimi Başaqlar da belə qalacaq. Bunu İsrailin Allahı Rəbb bəyan edir.

7) O gün insan öz Yaradanına nəzər salacaq, Gözləri İsrailin Müqəddəsini görəcək.

8) Əlləri ilə yaratdığı qurbangahlara baxmayacaq, Barmaqları ilə düzəltdiyi Nə ilahə Aşeranın rəmzi olan sütunlara, Nə də buxur qurbangahlarına nəzər salmayacaq.

9) O gün istehkamlı şəhərləri İsrail övladlarından qaçan Hivlilərlə Emorluların tərk etdiyi Şəhərlərə bənzəyəcək, viran qalacaq.

10) Sən, ey İsrail, sənə qurtuluş verən Allahını unutdun, Pənahgahın olan Qayanı xatırlamadın. Buna görə də sən əcnəbi bütlər üçün bağ əkirsən, Özgə ağacların budaqlarından peyvənd edirsən.

11) Onları əkdiyin gün böyüdürsən, Ertəsi gün çiçəkləndirirsən, Amma kədərli, sağalmayan ağrılı gündə məhsul verməyəcəklər.

12) Ah, çoxsaylı xalqların gurultusu Dənizlərin gurultusuna bənzər! Ümmətlərin nəƏrəsi böyük suların çağlayışına oxşar!

13) Ümmətlərin səsi böyük suların gurultusuna bənzəyəcək, Lakin Allah onları məzəmmət edəcək, Onlar uzaqlara qaçacaq, Küləyin qarşısında təpəliklərdəki saman çöpü kimi, Qasırğanın önündə yuvarlanan küləş kimi qovulacaqlar.

14) Axşamçağı onlar dəhşət doğururlar, Səhər açılmadan yox olurlar. Bizi soyanların aqibəti budur, Bizi qarət edənlərin sonu budur.

• 17:1-3 – Yer. 49:23-27; Amos 1:3-5; Zək. 9:1