-Yəhya 6:35
Müqəddəs Kitab
Yəhya - Fəsil 1
Fəsillər: Giriş 1 2 3 4 5 6 7 8 9 10 11 12 13 14 15 16 17 18 19 20 21
Allah Kəlamı
1) Başlanğıcda Kəlam var idi. Kəlam Allahla birlikdə idi. Kəlam Allah idi.
2) O, başlanğıcda Allahla birlikdə idi.
3) Hər şey Onun vasitəsilə yarandı və yaranan şeylərdən heç biri Onsuz yaranmadı.
4) Həyat Onda idi və bu həyat insanların nuru idi.
5) Nur qaranlıqda parlayır, qaranlıq isə onu anlamadı.*
6) * Allahın göndərdiyi bir adam ortaya çıxdı, onun adı Yəhya idi.
7) O, şəhadət üçün gəldi ki, Nur barədə şəhadət etsin və hamı onun vasitəsilə iman etsin.
8) O özü Nur deyildi, amma Nur barədə şəhadət etmək üçün gəldi.
9) Bu, həqiqi Nur idi və dünyaya gələrək hər bir insanı işıqlandırırdı.
10) O, dünyada idi, dünya Onun vasitəsilə yarandı, amma dünya Onu tanımadı.
11) Öz diyarına gəldi, amma soydaşları Onu qəbul etmədi.
12) Lakin Onu qəbul edənlərin hamısına, adına iman edənlərə Allahın övladları olmaq səlahiyyətini verdi.
13) Onlar nə qandan, nə bəşər arzusundan, nə də kişi istəyindən deyil, yalnız Allahdan doğuldu.
14) Kəlam bəşər olub, lütf və həqiqətlə dolu olaraq aramızda məskən saldı; biz də Onun ehtişamını – Atadan gələn vahid Oğulun ehtişamını gördük.
15) Yəhya Onun barəsində şəhadət etdi və nida edib dedi: «“Məndən sonra Gələn məndən üstündür, çünki məndən əvvəl mövcud idi” deyib haqqında danışdığım Adam budur».
16) Hamımız Onun dolğunluğundan lütf üstünə lütf aldıq.
17) Musa vasitəsilə Qanun verildi, lütf və həqiqət isə İsa Məsih vasitəsilə gəldi.
18) Allahı heç kəs heç vaxt görməyib, amma Atanın qucağındakı Özü Allah olan* vahid Oğul Onu tanıtdı.
Yəhyanın şəhadəti
(Mat. 3:1-12; Mrk. 1:1-8; Luk. 3:1-18)
19) Yəhudi başçıları Yəhyadan kim olduğunu soruşmaq üçün Yerusəlimdən kahinlərlə Levililəri göndərdilər. O zaman Yəhya belə şəhadət etdi:
20) o, düzünü danışıb inkar etmədi və «mən Məsih deyiləm» deyə açıq bildirdi.
21) * Onlar Yəhyadan soruşdu: «Bəs sən kimsən? Bəlkə İlyassan?» Yəhya «xeyr, o deyiləm» dedi. Soruşdular: «Bəlkə gəlməli olan peyğəmbərsən?», Yəhya «xeyr» söylədi.
22) Sonra ona dedilər: «Bəs sən kimsən? Bizi göndərənlərə nə cavab verək? Özün barədə nə deyirsən?»
23) * Yəhya dedi: «Mən Yeşaya peyğəmbərin söylədiyi kimi “Rəbbin yolunu hazırlayın” deyə səhrada gələn nida səsiyəm».
24) Göndərilən bə’zi fariseylər
25) Yəhyadan soruşdu: «Bəs sən Məsih, İlyas yaxud gəlməli olan peyğəmbər deyilsənsə, nə üçün vəftiz edirsən?»
26) Yəhya onlara cavab verdi: «Mən su ilə vəftiz edirəm. Aranızda tanımadığınız bir Nəfər dayanıb.
27) O məndən sonra gəlir. Mən heç Onun çarığının bağını açmağa da layiq deyiləm».
28) Bu hadisələr İordan çayının o tayında olan Bet-Anyada, Yəhyanın vəftiz etdiyi yerdə baş verdi.
29) Ertəsi gün Yəhya İsanın ona tərəf gəldiyini görüb dedi: «Dünyanın günahını aradan götürən Allah Quzusu budur!
30) “Məndən sonra bir Adam gəlir ki, məndən üstündür, çünki məndən əvvəl mövcud idi” deyib haqqında danışdığım Adam budur.
31) Mən Onu tanımırdım, amma Onun İsrailə zahir olması üçün mən su ilə vəftiz edərək gəldim».
32) Yəhya şəhadət edib dedi: «Gördüm ki, Ruh göydən göyərçin kimi endi və Onun üzərində qaldı.
33) Onu tanımırdım, lakin su ilə vəftiz etmək üçün məni göndərənin Özü mənə dedi: “Ruhun kimin üzərinə enib qaldığını görsən, bil ki, Müqəddəs Ruhla vəftiz edən Odur”.
34) Mən də görüb “Allahın Oğlu budur” deyə şəhadət etmişəm».
İsanın ilk şagirdləri
35) Ertəsi gün yenə Yəhya şagirdlərinin ikisi ilə dayanmışdı.
36) İsa yoldan keçərkən Yəhya Ona baxıb dedi: «Allah Quzusu budur!»
37) Həmin iki şagird onun sözlərini eşidib İsanın ardınca getdi.
38) İsa dönüb ardınca gəldiklərini görərək onlara «Sizə nə lazımdır?» dedi. Onlar İsaya dedi: «Rabbi, (tərcüməsi “Müəllim” deməkdir) Sən harada qalırsan?»
39) İsa onlara dedi: «Mənimlə gəlin, görərsiniz». Onlar gedib İsanın harada qaldığını gördülər və həmin gün Onunla qaldılar. Onuncu saat* radələri idi.
40) Yəhyadan eşidib İsanın ardınca gedən iki nəfərdən biri Şimon Peterin qardaşı Andrey idi.
41) Sonra o, ilk öncə qardaşı Şimonu tapıb ona «biz Məsihi (tərcüməsi “Məsh olunmuş”* Xristos. deməkdir) tapdıq» dedi.
42) Onu İsanın yanına apardı. İsa Şimona baxıb dedi: «Sən Yəhya oğlu Şimonsan, amma Kefa (tərcüməsi “Peter”, yə’ni “daş” deməkdir) adlanacaqsan».
43) Ertəsi gün İsa Qalileyaya getmək istədi. O, Filipi tapıb ona «ardımca gəl» dedi.
44) Filip də Andrey və Peter kimi Bet-Sayda şəhərindən idi.
45) Filip Nataneli tapıb ona dedi: «Musanın Qanunda yazdığı, peyğəmbərlərin də bəhs etdiyi Yusif oğlu Nazaretli İsanı tapdıq».
46) Natanel ona dedi: «Nazaretdən heç yaxşı şey çıxarmı?» Filip isə ona «gəl özün bax» dedi.
47) İsa Natanelin Ona tərəf gəldiyini görüb haqqında belə dedi: «Bu, həqiqətən, ürəyində hiylə olmayan bir İsraillidir».
48) Natanel «Sən məni haradan tanıyırsan?» deyə Ondan soruşdu. İsa ona cavab verdi: «Filip çağırmazdan əvvəl səni əncir ağacının altında gördüm».
49) Natanel Ona dedi: «Rabbi, Sən Allahın Oğlusan, İsrailin Padşahısan!»
50) İsa ona cavab verib dedi: «Səni əncir ağacının altında gördüyümü söylədiyim üçünmü Mənə inanırsan? Sən bunlardan daha böyük şeylər görəcəksən».
51) * Yenə ona dedi: «Doğrusunu, doğrusunu sizə deyirəm: göyün açıldığını və Allahın mələklərinin Bəşər Oğlu üzərinə enib-qalxdığını görəcəksiniz».
- 1:5 Anlamadı – yaxud məğlub etmədi.
- 1:6 Mat. 3:1-2; Mrk. 1:4; Luk. 3:1-2
- 1:18 Özü Allah olan – bə’zi əlyazmalarda bu sözlər yoxdur.
- 1:21 Qanun. 18:15,18; Mal. 4:5
- 1:23 Yeş. 40:3
- 1:39 Onuncu saat – hazırkı vaxtla günortadan sonra saat dörd.
- 1:41 Məsh olunmuş – yunan mətnində
- 1:51 Yar. 28:12
